IP，搶定唔搶？

August 22, 2007 at 12:22 am · Filed under 生活

近來公司打夠四圈麻將，要大執位。我被燉冬菇至Reception後補位置，Reception請假時我就要頂上，真真不愧為垃圾筒，乜都做。其實我係咪失左憶，原來係個有錢仔去參加咩生活體驗計劃呢？

離題離題，回到主題，執位後斷線斷到阿媽都唔認得。SSH幾分鐘就會hang機；E-mail寫完之後就send唔出去；Skype只見到我一個人online；MSN就好似恒生指數咁上上落落上上落落！

個人斷線最高紀錄︰正好Angus過黎叫我SSH去某部機望下野，我就話狂斷線，唔樂觀。話方畢，SSH三秒就hang鬼左，我只係夠時間打一句「ls」，咁既環境真係好難唔激到紮紮跳。

諗住係LAN線問題，換過唔得。LAN線頭問題？四周亂偷，都唔得。Firewall？LAN卡？點呀？最後懷疑係有人偷我IP黎用。

偷IP黎用？唔出奇架，但動機不明…明明DHCP架嘛，你static咁hardcode個IP做乜鬼？重點係——喂，你搶隔離果個啦，搶我果個做乜！

與此同時身邊幾個不良分子建議︰你自己static求其打另一個IP黎用啦。

豈有此理…唔怪得咁多人會偷IP…原來如此…

本來自命清高，唔制。但幾日黎真係頂唔順，大佬，打封E-mail成粒鐘都send唔到出去，SSH又唔得，網都未必上得到，真係折磨…我唔係得個講字架，真係激到紮紮跳架。

我呢類無乜骨氣既人，都係算吧啦。拿拿聲精選左個IP黎用，嘩，好似電視幸福傷風素廣告咁，暢通哂！爽！

搶人IP？搶！咩唔搶呀？

4 Comments »