如果雷曼可以用公帑賠，咁我強迫金有冇人會賠？
中新網10月8日電 香港《大公報》今日在“要聞”欄目報導稱，港府早前建議銀行按市值回購雷曼迷你債券，但此舉被大部分雷曼苦主齊聲反對，要求得到全數的賠償。
香港民建聯7日約見300名苦主，聆聽意見，並同時提出新建議，促請特區政府動用40億元，填補在銀行回購迷你債券時出現的差額，使雷曼苦主取回應得的資產。民建聯同時提出共四項建議，並承諾將向特區政府施壓，以協助受影響的投資者取回原有資產。
又係一群受道德沖昏頭腦既人。
之前汶川地震又係咁，政府自作主張撥款100億去賑災。喂，老細，D錢我有份既，你有冇問過我先呢？
「咁既情況你都反對捐錢賑災？你無人性！你唔係人！」呢D就叫受道德沖昏頭腦。道德大過天，就唔理處理事件對或錯，總之我做呢件事既動機係出於善心，你反對，即係同道德搞對抗！
而家我無話唔肯捐，問題係出係你既處事手法，你拎我D錢去捐之前有冇問過我先？正如你係銀行做定期，佢有朝一日同你講話你D存款全部拎哂去做善事，你又會點諗？
我同意雷曼苦主係好可憐，而且我假設佢地100%都係受人欺騙，全部都係唔貪心既人，非常值得同情。我亦都唔想討論話投資要自己承受風險既責任感問題，總之佢地好抵幫啦。
咁都未答到點解要用公帑賠番畀你喎？
冤有頭債有主，你俾人呃點解會係叫大家賠番畀你？銀行唔肯賠，而政府好蝦D所以就屈政府呀？民建聯，你抽錯水。你要做既係繼續要求銀行賠償，而唔係屈政府去補差價！銀行呃你，叫民建聯幫你去告銀行囉？政府應該做既係幫你追討賠償，而唔係政府自己去賠償！
講到呃，強迫金就真係呃啦！定哂法律每個月叫大家交筆錢出黎，畀班專家去管，點知而家遇上金融海嘯渣都無剩，呢度又有冇得賠？政府用法律黎打劫我喎？我每個月唔交錢會犯法架喎？但我眼見金融海嘯都要倒錢落海？呢單係政府屈我既，係咪更加應該賠？我輸打贏要？強迫金真係名副其實既「焗賭」喎，我無得唔供架喎？
整個總結，廢事誤會我無良無同情心︰
- 雷曼苦主好可憐，抵幫；
- 民建聯討好巿民用錯方法，唔敢向銀行追討而去恰政府；
- 政府你應該做既係幫苦主向銀行追討，唔係直接賠償了事。
lazytommi said,
October 10, 2008 @ 4:33 am
你同我都變成強迫金苦主, 我MPF無左25%啊
ShawTim said,
October 10, 2008 @ 11:00 am
我無左30%以上… T_T
最慘係我明知金融海嘯
我仲要俾人用法律打劫倒錢落去
而個強迫金又無一項係保證可以保本的
呢D係政府攻策上有問題
又係全港巿民既權益
都無人咁高調地嘈要賠啦
當初支持強迫金果班議員勁係潛哂水
wanleung said,
October 10, 2008 @ 12:43 pm
我無左一半，不論高風險的還是保本。
ShawTim said,
October 11, 2008 @ 1:17 am
保本 = 保證蝕本
wanleung said,
October 14, 2008 @ 3:48 pm
有趣是，民建聯口口聲聲話要政府包底，但在設立專責委員會調查此次事件上，投反對票，
即又要政府用公帑包底，但不去查金管局，政監銀監等部門有沒有失職，
明顯是想分化苦主及其他香港人，增加社會對立。
ShawTim said,
October 15, 2008 @ 10:16 pm
我真係好憎民建聯
好憎
好憎